manzilen nahin chaltin fasla nahin chalta
rahgir chalte hain rasta nahin chalta

taqaton ke ghere hain himmaton ki ek had hai
koi waqt ke aage hausla nahin chalta

ek udas hote hain sab udas hote hain
aur is udasi ka kuchh pata nahin chalta

jo bhi hai pahunchta hai dub kar kinaron tak
ishq ke samundar mein tairna nahin chalta

khud-bakhud gulistan mein har kali sanwarti hai
is nigar-khane mein aaina nahin chalta

sirf rahbar 'taban' rasta dikhata hai
shauq le ke chalta hai rahnuma nahin chalta