mashhur to bas ek diya hai mere dil mein
kitne hi sitaron ki jagah hai mere dil mein

tum ne to hikayat hi sun rakkhi hain warna
wo shahr wo kheme wo sira hai mere dil mein

main rah se bhatkun to khatakti hai koi baat
jis tarah koi samt-numa hai mere dil mein

duniya se guzarne ko abhi umr padi hai
ye khwab to kuchh din ko ruka hai mere dil mein

ye ghar dar-o-diwar ki had tak hai salamat
lekin wo jo ghar tut gaya hai mere dil mein

ye log zara der ko tal jaen to 'babar'
main dekh lun kya waqt hua hai mere dil mein