mashuqa-e-naqab naqab mein hai
mahjuba abhi hijab mein hai

mehndi na laga ki jaan meri
hathon se tere azab mein hai

tu hai wo bala ki mah o khurshid
zulfon ki tere rikab mein hai

har ek tujhe aap sa kahe hai
qaziya mah o aaftab mein hai

allah-re tere pasine ki bu
kab aisi bhabhak gulab mein hai

is zulf ka ainthna to dekho
bin chhede hi pech-o-tab mein hai

qahhaari ki shan jab se teri
aalam ke upar itab mein hai

dil koh ka ho gaya hai pani
dariya sab iztirab mein hai

uth 'mushafi' aaftab nikla
ab tak tu diwane khwab mein hai