masruf rahguzar pe chala ja raha tha main
phir kyun laga ki sab se juda ja raha tha main

tamir-e-zat hi mein lagi zindagi tamam
khaliq bana raha tha bana ja raha tha main

hasil thin jin ko rahaten wo bhi fana hue
kyun apni muflisi se dara ja raha tha main

dariya-e-zist ki yahi manzil thi aakhiri
ek bahr-e-be-karan mein gira ja raha tha main

samjha tha aaine mein mera aks hi nahin
zahir tha aur sab se chhupa ja raha tha main

pahle to ku-e-yar ki phir dar ki talab
daldal mein khwahishon ki dhansa ja raha tha main

main gard-e-rah tha magar eajaz dekhiye
har karwan ke sath uda ja raha tha main

rukne mein dar ye tha ki tawazun bigad na jae
'adil' isi guman mein chala ja raha tha main