masti mein bhi khayal-e-hudud-e-adab raha
ashkon mein haal arz kiya basta-lab raha

tere karam ne mujh ko ata ki wo be-khudi
arz-e-sipas ka mujhe phir hosh kab raha

tu ne jo kuchh diya wo diya lutf-e-khas se
paband-e-astin mera dast-e-talab raha

us bazm mein nigah pe qabu na rakh saka
han mujh ko e'tiraf hai main be-adab raha

daur-e-amal mein hum se to kuchh bhi na ho saka
itna hua ki shohra-e-bazm-e-adab raha

jam-e-tahi mila teri mahfil se kya hua
paimana dil ke khun se yahan lab-ba-lab raha

'fitrat' rumuz-e-ishq na kah girya-kosh rah
sab kuchh kaha usi ne jo yan basta-lab raha