mat ho maghrur ai ki tujh mein zor hai
yan sulaiman ke muqabil mor hai

mar gae par bhi hai saulat faqr ki
chashm-e-shir apna charagh-e-gor hai

jab se kaghaz-baad ka hai shauq use
ek aalam us ke upar dor hai

rahnumai shaikh se mat chashm rakh
wae wo jis ka asa kash-kor hai

le hi jati hai zar-e-gul ko uda
subh ki bhi baw-baadi chor hai

dil khinche jate hain sare us taraf
kyunke kahiye haq hamari or hai

tha bala hangama-ara 'mir' bhi
ab talak galiyon mein us ka shor hai