mathe pe padi zulf-e-girah-gir hila di
kyun tum ne dil-e-khufta ki zanjir hila di

waise to mere ishq ka har naqsh hasin tha
jab dard ne khinchi to ye taswir hila di

khat bhej diya kat ke paiman-e-mulaqat
ye kaun hai jis ne teri tahrir hila di

yun hi na samajh ahl-e-mohabbat ke junun ko
kam-bakht ne jab chaha hai taqdir hila di

wo zalzala go roz hila deta tha dil ko
is bar magar sari hi tamir hila di