mushkil mein raha wo bhi ki tadbir na tha main
main khwab to tha us ka pe tabir na tha main

yun bhi hua us ne mujhe sajdon se nawaza
bad-bakhti se jis shakhs ki taqdir na tha main

wo chhod gaya rah mein ye us ki raza thi
waise bhi kisi panw mein zanjir na tha main

is zauq-e-sukhan ne kiya ruswa-e-zamana
pahle to tere raaz ki tashhir na tha main

karta bhi to kaise meri pahchan zamana
dukh aisa tha khud apni bhi taswir na tha main