matlab na subh se na gharaz koi sham se
apni to zindagi hai faqat daur-e-jam se

waqif hai kaun ghuncha-o-gul ke maqam se
sehn-e-chaman mein phaile hue hain jo dam se

hoti nahin hai jin ko mayassar shab-e-nashat
subh-e-bahaar ke liye rote hain sham se

duniya samajh gai hai ki hai ye fareb-e-zist
darne lage hain log mohabbat ke nam se

tar-e-nafas ki lai pe hai aawaz-e-zindagi
naghme baraste rahte hain saz-e-dawam se

azm-e-samim le ke nikalta hun jab kabhi
manzil dikhai deti hai do-chaar gam se

hoti chali hai jab se tabiat junun-nawaz
rahne laga hun dur khirad ke maqam se

sada-dili nahin to ise aur kya kahen
hum gham utha rahe hain masarrat ke nam se

'khushtar' milenge sab mere haalat-e-zindagi
khud aap jaanch lijiye mere kalam se