mauj-e-hawa se phulon ke chehre utar gae
gil ho gae charagh gharaunde bikhar gae

pedon ko chhod kar jo ude un ka zikr kya
pale hue bhi ghair ki chhat par utar gae

yaadon ki rut ke aate hi sab ho gae hare
hum to samajh rahe the sabhi zakhm bhar gae

hum ja rahe hain tutte rishton ko jodne
diwar-o-dar ki fikr mein kuchh log ghir gae

chalte huon ko rah mein kya yaad aa gaya
kis ki talab mein qafile wale thahar gae

jo ho sake to ab ke bhi sagar ko laut aa
sahil ke sip swاati ki bundon se bhar gae

ek ek se ye puchhte phirte hain ab 'nizam'
wo khwab kya hue wo manazir kidhar gae