mauj-e-shamim hain na khiram-e-saba hain hum
thahri hui gulon ke labon par dua hain hum

begana khalq se hain na tujh se khafa hain hum
ai zindagi muaf ki dair-ashna hain hum

is raaz ko bhi fash kar ai chashm-e-dil-nawaz
kanta khatak raha hai ye dil mein ki kya hain hum

yarab tera kamal-e-hunar hum pe khatm hai
ya sirf mashq-e-naz ka ek tajraba hain hum

aakhir tere suluk ne jhutla diya ise
ek zoam tha hamin ki sarapa wafa hain hum

kal is zamin pe utrenge phulon ke qafile
ek paikar-e-bahaar ki aawaz-e-pa hain hum