mausam bhi yaad-e-yar mein dil-gir ho gaya
tanhaiyon se meri baghal-gir ho gaya

daman pe mere dagh lagane ki zid mein wo
kirdar ki wo apne hi tashhir ho gaya

bachchon ne mujh ko ghar se nikalne nahin diya
rishta ye mere panw ki zanjir ho gaya

marne se us ko apne kabhi dar nahin laga
jina jab us ke waste tazir ho gaya

allah ne rat-jagon ki duaen qubul ki
wo khwab mere khwab ki tabir ho gaya

aansu mein dhal ke zer-e-lahad kho gaya kahin
ya dard ban ke dil se baghal-gir ho gaya

'sima' ulajh gai hai siyasat ke jal mein
dil ka moamla tha jo gambhir ho gaya