maut hai tere marizon ko shifa ho jaana
qahr hai qaid-e-masaib se riha ho jaana

hae mushtaq-e-shahadat se khafa ho jaana
tegh ka qismat-e-arbab-e-wafa ho jaana

ahl-e-duniya meri qismat falak-e-na-hanjar
sab to ruthe hain kahin tum na khafa ho jaana

sab jafaon ki talafi hai sitam-kash ke liye
tum se wade koi bhule se wafa ho jaana

apni haalat ki khabar kuchh nahin achchha hai yahi
bais-e-marg hai ehsas-e-baqa ho jaana

bahr-e-taskin dil-e-zar yahi kafi hai
shikwa-e-jaur pe iqrar-e-wafa ho jaana

aatish-e-rashk se ye shauq jalata hai mujhe
us sitamgar ka paband-e-jafa ho jaana

jaanna apni haqiqat ka bahut mushkil hai
sirr-e-maktum hai bande ka khuda ho jaana

ab lab-e-yar pe purshish hai tamanna ki 'shamim'
kaam aaya mera raazi-ba-raza ho jaana