mehrbani hai ye chashm-e-yar ki
maut bar-haq hai dil-e-bimar ki

wajh bhi zahir karen inkar ki
kuchh to gunjaish ho istifsar ki

pal mein tariki hai pal mein raushni
shakl hai ye mukhtalif adwar ki

aadmi ho zindagi mein surkh-ru
laj rah jae agar pindar ki

paikar-e-husn-e-ada hai jis ki zat
dil mein chahat hai usi dildar ki

khana-e-dil se kahan jaenge aap
had muqarrar hai dar-o-diwar ki

ho chuki 'hasrat' bahut din shaeri
fikr karni hai tujhe ghar-bar ki