meri ghazal ki sabahat ko khadd-o-khal to de
aur is khayal ko aaina-e-jamal to de

kahin na kar de ise gharq zor tufan ka
bhanwar se kashti-e-dil na-khuda nikal to de

ghazal ki shan bhi rah jae aur meri bhi
mera mizaj achhuta sa ek khayal to de

shuur-o-fikr ki ranaiyon mein kho jaun
khayal-e-mazi ko aashuftagi-e-haal to de

main imtihan-e-wafa se bhi surkh-ru niklun
sawal-name mein aisa koi sawal to de

gham-e-zamana gham-e-arzu gham-e-‘hasrat’
meri hayat ko kuchh aur mah-o-sal to de