mein kya hun kaun hun ye batane se main raha
ab khud ko khud se khud ko milane se main raha

main lad pada hun aaj khud apne khilaf hi
ab darmiyan se khud ko hatane se main raha

hai zindagi asir-e-adam jaanta hun main
duniya tere fareb mein aane se main raha

mujh mein kahan hai tujh se judai ka hausla
ai meri jaan tujh ko ganwane se main raha

wahshat bhi apni itni taqqul pasand hai
dasht-e-junun mein khak udane se main raha

han waz-e-ehtiyat ka qail nahin hun mein
jo zakhm hai jigar mein chhupane se main raha

wo log mera nam-o-nasab puchhte hain ab
jin ki nazar mein ek zamane se main raha

kuchh yar mere itne sataish pasand hain
'shahid' ab un ko sher sunane se main raha