mera aaghosh-e-nazar yaad aaya
jalwa-e-dost ko ghar yaad aaya

aankh hangama-e-mahshar mein khuli
fitna-e-rahguzar yaad aaya

ghairat-e-ishq bhi hathon se gai
dil agar bar-e-digar yaad aaya

ab milate nahin duniya se nazar
koi gustakh-nazar yaad aaya

aap ke dar pe mila sar apna
sajda yaad aaya to sar yaad aaya

hosh-e-hasti pe hua josh-e-karam
dil idhar dard udhar yaad aaya

aaj baithe hain wo shamshir-ba-kaf
kis gunahgar ka sar yaad aaya

'najm' ye fikr hai nazr-e-'ghaalib'
'ghaalib'-e-khasta jigar yaad aaya