sukun-e-dil ki lazzat chahta hun
faqiri mein ye daulat chahta hun

hukumat ki mohabbat dushmanon ko
mohabbat ki hukumat chahta hun

siyasat ka andhera chha raha hai
zara nur-e-sadaqat chahta hun

unhen ye panw phailana mubarak
kahin main bhi sukunat chahta hun

bahut kya chahta hun aadmi se
zara si aadamiyyat chahta hun

gae 'najm' ahl-e-dil duniya se kitne
bas ab main bhi ijazat chahta hun