mera dil hai mushtaq us gul-badan ka
ki ye bagh ek gul hai jis ke chaman ka

wahi zulf hai jis ki nikhat se ab tak
pada khun sukhe hai mushk-e-khutan ka

wahi lal-e-lab hai ki hasrat se jis ke
jigar aaj tak khun hai lal-e-yaman ka

ajab sair dekhi 'nazir' us chaman ki
abhi wasl tha nargis-o-tastaran ka

abhi yak-digar jama the sumbul-o-gul
abhi tha baham josh sarw-o-saman ka

abhi chahchahe bulbulon ke ayan the
abhi shor tha qumri-e-nara-zan ka

ghadi bhar ke hi baad dekha ye aalam
ki nam-o-nishan bhi na wan tha chaman ka