mera shikwa har ek sohbat mein subh-o-sham karte hain
khuda jaane mujhe itna wo kyon badnam karte hain

gila un ki jafaon ka jo subh-o-sham karte hain
tera shikwa bhi wo ai gardish-e-ayyam karte hain

sahar hote hi hum yakja subu-o-jam karte hain
sawere hi se dur-andesh fikr-e-sham karte hain

mohabbat mahz ruswai hai ai dil soch le is ko
badi mushkil se paida log apna nam karte hain

kisi se ham-sukhan hota nahin mahfil mein parwana
unhen baaten nahin aatin jo apna kaam karte hain

hamin ko kyon banaya takhta-e-mashq-e-sitam tum ne
tumhaare ishq ka dawa to khas-o-am karte hain

bade nadan hain jin ko hai ummid-e-karam tujh se
jo aaqil hain wo kab aisa khayal-e-kham karte hain

rahi umr-e-rawan garm-e-safar shab ko bhi ai 'sahir'
jinhen hai fikr manzil ki wo kab aaram karte hain