mera shuur mujh ko ye aazar de gaya
suraj ki tarah dida-e-bedar de gaya

har phul ek sharar hai to har shakh ek barq
jannat ka khwab dozakh-e-gulzar de gaya

lab-bastagi mein hasrat-e-guftar jag uthi
khauf-e-sukut jurat-e-izhaar de gaya

jalta hun apni aag mein khurshid ki tarah
kaisi saza ye shoala-e-pindar de gaya

mahw-e-sukhan tha main ki mera aks hans pada
aaine se nikal ke ye ashaar de gaya