mere is dida-e-khun-nab ke pichhe pichhe
ek be-khwabi hai is khwab ke pichhe pichhe

umr bhar chain nahin pate hain wo log ki jo
bhagte rahte hain asbab ke pichhe pichhe

dil bhi ashkon ke taaqub mein baha jata hai
ek sahra sa hai sailab ke pichhe pichhe

kuchh to ta-umr rahe kasb-e-hunar mein masruf
aur kuchh tamgha-o-alqab ke pichhe pichhe

jis ki takmil pe aankhen bhi gain dil bhi gaya
umr guzri thi usi khwab ke pichhe pichhe

un pe zindan ki fasilon ko bhi pyar aata hai
jo chale aate hain ahbab ke pichhe pichhe

hum to is darja tere nam ke diwane hain
jaise daude koi surkhab ke pichhe pichhe