mere madd-e-muqabil tir khanjar aur bhaale hain magar aise kai bhaale mere dil ne sambhaale hain muqayyad daera-dar-daera hai zindagi meri mere har chand ke chaaron taraf tarik haale hain kate ki zindagi kaise musalsal jabr mein rah kar safar sahra ka hai aur panw mein chhaale hi chhaale hain bhula sakta hun kaise war jo sine pe khae hain ki us ke zakhm bhi aulad ki manind pale hain haqiqat to ye hai har ahd ke kirdar yaksan hain wahi suqraat hai aur zahr se labrez pyale hain mere ghar mein hai kya rakkha teri khidmat-guzari ko ki mere pas to mehman-e-jaan gham ke niwale hain badhun aage ki pichhe laut jaun ai 'suhail'-amjad mere pichhe hain gahri khaiyan aage himale hain