mere marne se tum ko fikr ai dildar kaisi hai
tumhaari dil-lagi ko mahfil-e-aghyar kaisi hai

hamare ghar se jaana muskura kar phir ye farmana
tumhein meri qasam dekho meri raftar kaisi hai

wo mujh se puchhte hain ghair se aur tum se kyun bigdi
zara hum bhi sunen aapas mein ye takrar kaisi hai

maaz-allah barq-e-husn kis ki aankhen uthne de
tamashai nahin waqif ki shakl-e-yar kaisi hai

'hasan' jam-e-mai-e-gul-rang le kar sochte kya ho
agar qimat nahin qimat mein ye dastar kaisi hai