mere nalon mein nihan soz bhi hai saz bhi hai
meri aawaz mein shamil teri aawaz bhi hai

muzhda ai kaba-o-but-khana mera husn-e-nazar
but-tarashi mein bhi mahir hai khuda-saz bhi hai

apni haalat pe mujhe khud hi taras aata hai
par-shikasta hun magar khwahish-e-parwaz bhi hai

meri qismat hi nahin meri tabahi ka sabab
is mein us shokh ki shamil nigah-e-naz bhi hai

ishq mein maut se milti hai hayat-e-abadi
ishq ki maut to anjam bhi aaghaz bhi hai

sai-e-ikhfa-e-mohabbat to baja hai lekin
sai-e-ikhfa hi mohabbat ki to ghammaz bhi hai