mere tasawwuraat hain tahriren ishq ki
zindani-e-khayal hain zanjiren ishq ki

tabir-e-husn hai dil-e-majruh ka lahu
chhinte pade to ban gain taswiren ishq ki

dagh-e-firaq zakhm-e-wafa ashk-e-khun-fishan
roz-e-azal se hain yahi jagiren ishq ki

sham-e-khizan ko subh-e-bahaaran bana diya
tartib-e-zist ban gain taziren ishq ki

'saghar' jahan-e-shauq mein dekhi hai jawedan
ahl-e-nazar ke samne tafsiren ishq ki