mere wajud se aati hai ek sada mujh ko
ki mere jism se kar de koi juda mujh ko

meri talash ka hasil faqat tahayyur hai
main kho gaya hun kahan khud nahin pata mujh ko

main apne jism ke andar simat ke baitha hun
bula raha hai kahin dur se khuda mujh ko

main tujh ko dekhun magar guftugu na kar paun
khuda ke waste aisi na de saza mujh ko

wo lahja ab bhi tasawwur mein gunjta hai 'asar'
wo chehra ab bhi dikhata hai aaina mujh ko