meri aahen mere nale meri sansen us ki
subh hai nam usi ke meri shamen us ki

us ne bhi khul ke kiye pyar ke dawe mujh se
main bhi elaniya karne laga baaten us ki

phir mahakti hui tanhaiyon ne gher liya
mausam-e-gul ki tarah aa gain yaaden us ki

intizar us ko hama-waqt mera rahta hai
meri aahat se dhadak jati hain rahen us ki

lakh gum-karda-e-manzil kahan jae lekin
dhund hi leti hain 'rizwan' ko panahen us ki