meri chahat ki bahut lambi saza do mujh ko
karb-e-tanhai mein jine ki dua do mujh ko

fan tumhaara to kisi aur se mansub hua
koi meri hi ghazal aa kar suna do mujh ko

haal behaal hai tarik hai mustaqbil bhi
ban pade tum se to mazi mera la do mujh ko

aakhiri shama hun main bazm-e-wafa ki logo
chahe jalne do mujhe chahe bujha do mujh ko

khud ko rakh ke main kahin bhul gai hun shayad
tum meri zat se ek bar mila do mujh ko