meri khamushi mein bhi eajaz aae
kahin se koi mujh ko aawaz aae

wo chehra na jaane kahan kho gaya hai
wo jis se lahu mein tag-o-taz aae

nikala kisi ne na patthar se bahar
mere shahr mein roz but-saz aae

ude nili nili ragon se nikal kar
mere dard mein zauq-e-parwaz aae

saza be-gunahi ki main katti hun
mujhe zindagi ke na andaz aae

mohabbat ai diwani pagal mohabbat
hamein chhod de dekh hum baz aae

meri tishna-kaami sawali hai jis ki
kabhi to wo 'nainan' ba-sad-naz aae