meri mayus nazron ko tera didar ho jae
to ye soi hui taqdir phir bedar ho jae

qayamat ki kashish hai tujh mein jo bhi ek nazar dekhe
wo tujh par jaan dene ke liye tayyar ho jae

tera gham hai mata-e-zist ye main bhi samajhta hun
magar wo kya kare jo zist se bezar ho jae

tumhaare dar pe main kab se lagae aas baitha hun
idhar bhi ek nigah-e-lutf ai sarkar ho jae

udate ho hansi 'fayyaz' tum meri mohabbat ki
meri surat tumhein bhi ishq ka aazar ho jae