meri palkon pe khwab rahne de kuchh na kuchh iztirab rahne de haq-bayani to mera shewa hai mujh ko zer-e-itab rahne de tujh ko fursat mile to padh lena mujh ko misl-e-kitab rahne de teri aankhen to khud nashili hain zikr-e-jam-o-sharab rahne de tishnagi jab mera muqaddar hai mere haq mein sarab rahne de koi aaya hai saj ke gulshan mein aaj zikr-e-gulab rahne de likh de waiz gunah sab mujh par nam apne sawab rahne de zindagi to habab hai 'sarim' ab mujhe tu habab rahne de