mujh pe dahliz se phenka hai gul-e-tar kis ne
mere allah jagaya hai muqaddar kis ne

meri jaanib tha rafiqon ki rifaqat ka hisar
phir meri pusht pe ghonpa hai ye khanjar kis ne

husn-e-akhlaq ke paikar the hamare bachche
un ke hathon mein thamaya hai ye patthar kis ne

kitna pur-kaif hai girdab ka manzar dekho
dil ke talab mein phenka hai ye kankar kis ne

gul-badan zohra-jabin tu hi bata de mujh ko
is mohabbat se tarasha hai ye paikar kis ne

ghaebana hui hogi koi nusrat 'sarim'
warna tum ko yun banaya hai sukhan-war kis ne