meri qadim riwayat ko aazmane lage
mukhalifin bhi ab kashtiyan jalane lage

main ladkhadaya to mujh ko gale lagane lage
gunahgar bhi meri hansi udane lage

dil-e-haris se tamir ki hawas na gai
wo sath-e-ab pe kaghaz ka ghar banane lage

kisi ki rah-e-munawwar mein moajaza ye hua
hamare naqsh-e-kaf-e-pa bhi jagmagane lage

na jaane kis ka hamein intizar rahne laga
ki taq-e-dil pe diya roz hum jalane lage

hue kuchh itne mohazzab ki sans ghutne lagi
junun-pasand gale tak batan lagane lage

badal gaya hai zamana bhi doston ki tarah
mere harif bhi mujh se nazar churane lage

jinhon ne kanton pe chalna hamein sikhaya tha
hamari rah mein wo phul ab bichhane lage

shurua ho gaya aankhon mein jashn-e-khush-khubi
hui jo raat to har samt shamiyane lage