meri surat saya-e-diwar-o-dar mein kaun hai
ai junun mere siwa ye mere ghar mein kaun hai

thik hai ai zabt-e-gham! aansu koi tapka nahin
par ye dil se aankh tak paiham safar mein kaun hai

wo to kab ka apni manzil par pahunch kar so chuka
chand kya jaane ki rah-e-pur-khatar mein kaun hai

main to us surat ka diwana hun par ai zindagi!
surat-e-yak-umr hail sang o sar mein kaun hai

khak chhanwati hai ye raaton ko kis ki justuju
chandni ki tarah phaila dasht o dar mein kaun hai

ek chehra mustaqil ashkon ke aaine mein hai
kuchh bata ai umr-e-gham aakhir nazar mein kaun hai

panw mein lipti hui hai sab ke zanjir-e-ana
sab musafir hain yahan lekin safar mein kaun hai

naghma-e-jaan sunne walo ye takalluf ta-ba-kai
dha ke ye diwar bhi dekho ki ghar mein kaun hai