meri wahshat ka tere shahr mein charcha hoga
ab mujhe dekh ke shayad tujhe dhoka hoga

saf rasta hai chale aao su-e-dida-o-dil
aql ki rah se aaoge to phera hoga

kaun samjhega bhala husn-e-gurezan ki ada
mere isa ne mera haal na puchha hoga

wajh-e-be-rangi-e-har-sham-o-sahar kya hogi
main ne shayad tujhe har rang mein dekha hoga

ab kahin tu hi dubowe hamein ai mauj-e-sarab
warna phir shikwa-e-payabi-e-dariya hoga

koi tadbir bata ai dil-e-azar-pasand
us ko ji-jaan se bhulane mein to arsa hoga

husn ki khalwat-e-sada bhi hai sad-bazm-taraaz
ishq mahfil mein bhi hoga to akela hoga

jhutputa chhaya hai kaun aaya hai darwaze par
dekhna 'shaz' koi subh ka bhula hoga