mimbaron par bhi gunahgar nazar aate hain
sab qayamat ke hi aasar nazar aate hain

in masihaon se allah bachae hum ko
shakl-o-surat se jo bimar nazar aate hain

jaane kya tut gaya hai ki har ek raat mujhe
khwab mein gumbad-o-minar nazar aate hain

mat dete hain yazidon ko lahu se hum hi
hum hi nezon pe har ek bar nazar aate hain

aankh kholi hai fasadat mein jin bachchon ne
un ko khwabon mein bhi hathiyar nazar aate hain