misal-e-mauj-e-nasim-e-bahaar guzri hai
wo zindagi jo sar-e-ku-e-yar guzri hai

wo ek nigah jo paigham-e-sad-nashat bhi hai
na jaane kyon wo mere dil pe bar guzri hai

wo tishnagi jo sar-e-mai-kada nikharna thi
wo tishnagi bhi yunhi be-bahaar guzri hai

abhi abhi to na aa ai khayal-e-amad-e-yar
abhi abhi to shab-e-intizar guzri hai

hamein to un ki nigahon ka eatibar nahin
jo kah rahe hain idhar se bahaar guzri hai

tamam umr kiya un ka intizar 'akhtar'
tamam umr badi be-qarar guzri hai