sahib-e-jam-o-subu ahl-e-karam aate hain
hum se diwane magar dahr mein kam aate hain

kya sabab hai ki teri bazm mein ai jaan-e-hayat
jab bhi aate hain mere hisse mein gham aate hain

ab na zakhmon ki zarurat hai na marham ki talash
ye marahil bhi rah-e-ishq mein kam aate hain

jab bhi main shiddat-e-tanhai se ghabraya hun
ek aawaz si aai hai ki hum aate hain

un se kis tarah mulaqat karen hum aakhir
wo kahan hote hain jab hosh mein hum aate hain

ye mere azm-e-musalsal ki kashish hai 'akhtar'
meri jaanib meri manzil ke qadam aate hain