misal-e-saya mohabbat mein jal apna hun
tumhaare sath giraftar-e-haal apna hun

sarishk-e-surkh ko jata hun jo piye har-dam
lahu ka pyasa alal-ittisal apna hun

agarche nashsha hun sab mein khum-e-jahan mein lek
ba-rang-e-mai araq-e-infial apna hun

meri numud ne mujh ko kiya barabar khak
main naqsh-e-pa ki tarah paemal apna hun

hui hai zindagi dushwar mushkil aasan kar
phirun chalun to hun par main wabaal apna hun

tera hai wahm ki ye na-tawan hai jame mein
wagarna main nahin ab ek khayal apna hun

bala hui hai meri go ka tab-e-raushan 'mir'
hun aaftab wa-lekin zawal apna hun