misl-e-bulbul zamzamon ka khud yahan ek rang hai
arghanun is anjuman mein kharij-az-ahang hai

har khayal apna hai yan ek mutrib-e-shirin-nawa
har nafas sine mein ek mauj-e-sada-e-chang hai

har tasawwur hai mera 'aks-e-jamal-e-ru-e-dost
mera har majmu’a-e-wahm ek gul-e-khush-rang hai

lauh-e-dil har jumbish-e-mizhgan se hai ma'ni-pazir
har rag-e-andesha naqsh-e-khama-e-arzhang hai

'aks tera pad ke is mein ho gaya pakiza-tar
ai but-e-kafir meri aankhon mein faiz-e-gang hai

nazm-e-'akbar' se balaghat sikh len arbab-e-‘ishq
istilahat-e-junun mein be-baha farhang hai