misre pe un ke misra-e-qad ka guman hua
ek tabqa bait ka tabaq-e-asman hua

chunta hai apni jubbe par afshan-o-mehr-wash
gurdon ko shauq-e-parwarish-e-kahkashan hua

khincha jo dushmani se gareban ko dost ne
daman-e-ishtiyaq mera dhajjiyan hua

ghurenge kya gulon ko gulistan-e-dahr mein
rukhsat hui bahaar nuzul-e-khizan hua

dikhlaenge bahaar kalam-e-fasih ki
gar dahr mein 'shagufta' koi qadar-dan hua