mohabbat aur khushbu ka nagar taqsim ho jae
kahin aisa na ho ghar ka shajar taqsim ho jae

lahu roti hui aankhen lahu roti hi rahti hain
hawas ke hath jab purkhon ka ghar taqsim ho jae

kabhi bhi aag ki faslen yahan par ug nahin saktin
mohabbat sare aalam mein agar taqsim ho jae

udasi ke ghane jangal mein raste ja nikalte hain
fazaon mein naya jab ek dar taqsim ho jae

kabhi jo yaad karti hun teri qurbat ke lamhon ko
meri sanson talak us ka asar taqsim ho jae

meri man ki duaon ka 'samina' moajiza dekho
mere pairon mein aate hi bhanwar taqsim ho jae