mohabbat ghair se ki hai to mera muddaa le lo
mere dil pe guzarti kya hai is ka bhi maza le lo

jo kahta hun jafaen chhod do ahd-e-wafa le lo
to kahte hain khuda se tum muqaddar dusra le lo

jo puchha chhod dun ulfat to bole is se kya hoga
jo puchha apna dil le lun to jhunjhla kar kaha le lo

janab-e-khizr rah-e-ishq mein ladne se kya hasil
main apna rasta le lun tum apna rasta le lo

shab-e-furqat jo dard-e-dil se 'muztar' dam ulajhta hai
qaza kahti hai ghabrao nahin mujh se dawa le lo