mohabbat jazba hai ehsas hai aur sehr hai jaanan
rag-o-pai mein sarayat jo kare wo zahr hai jaanan

agar fursat mile to mere dil mein jhank kar dekho
tumhaari aarzuon ka basa ek shahr hai jaanan

tumhaari nim-wa aankhon mein jaane kya hai poshida
ki shokhi hai ghazab hai pyar hai ya qahr hai jaanan

kinare ab laga de ya dubo de us ki marzi hai
ki dil dariya ki ek biphri hui si lahr hai jaanan

zara socho ki haalat hogi kya 'shahzad' ke dil ki
wahi mausam gulabi hai wahi sah-pahr hai jaanan