yahi bahut hai jo inam is sadi ka hai
hamari aankhon mein aashob aagahi ka hai

wo lamha phir nahin aaya jo tere jaisa tha
ye saneha mere dil ki shikastagi ka hai

isi se paya hai main ne ghazal ka sarmaya
wo ek zakhm jo palkon pe raushni ka hai

nafas nafas jo meri chahaton mein rach na saka
sabab kahan wo bhala meri zindagi ka hai

meri shabon ka hai dibacha us ki lau mein 'ziya'
ye ek charagh jo suraj teri gali ka hai