mohabbat ka jab roz bazar hoga
bikenge sar aur kam kharidar hoga

tasalli hua sabr se kuchh main tujh bin
kabhi ye qayamat trahdar hoga

saba mu-e-zulf us ka tute to dar hai
ki ek waqt mein ye siyah-mar hoga

mera dant hai tere honton pe mat puchh
kahunga to ladne ko tayyar hoga

na khali rahegi meri jagah gar main
na hunga to andoh bisyar hoga

ye mansur ka khun-e-nahaq ki haq tha
qayamat ko kis kis se khun-dar hoga

ajab shaikh-ji ki hai shakl-o-shamail
milega to surat se bezar hoga

na ro ishq mein dasht-gardi ko majnun
abhi kya hua hai bahut khwar hoga

khinche ahd-e-khat mein bhi dil teri jaanib
kabhu to qayamat trahdar hoga

zamin-gir ho ijz se tu ki ek din
ye diwar ka saya diwar hoga

na mar kar bhi chhutega itna rukega
tere dam mein jo giraftar hoga

na puchh apni majlis mein hai 'mir' bhi yan
jo hoga to jaise gunahgar hoga