mohabbat kya salib-e-zindagi hai
dil-e-ruswa ka hasil khud-kushi hai

khud apni khwahishon ke aastan par
pareshan-haal kitna aadmi hai

shab-e-dair-o-haram se mai-kade tak
mere hi aansuon ki raushni hai

pilai umr-bhar saqi ne lekin
meri qismat mein ab tak tishnagi hai

hum apne aap ke qatil bane hain
ye kis tahzib ki jadugari hai

suno aawaz tum mere lahu ki
yahi to raaz husn-e-shairi hai

khafa hai in dinon 'rahi' se manzil
agarche khub teri rahbari hai