mohabbat mein inkar kitna hasin hai
ye andaz-e-iqrar kitna hasin hai

kisi ki mohabbat mein nam ho gaya hai
tera aaj rukhsar kitna hasin hai

ye mana ki sapna hai sansar lekin
ye sapnon ka sansar kitna hasin hai

diye hain jo tum ne nadamat ke aansu
tumhaara gunahgar kitna hasin hai

gulon se nahin shakh ke dil se puchho
ki ye bad-numa khar kitna hasin hai

zara aaina dekh o husn wale
bata de mera pyar kitna hasin hai

hua tha jo 'hairat' juda sab se pahle
gireban ka wo tar kitna hasin hai