mohabbaton ki ye wardaten koi sunega to kya kahega
ye bahki bahki tumhaari baaten koi sunega to kya kahega

raqabaton ki qayamaton se khandar mein tabdil ho rahi hain
hamari chahat ki kaenaten koi sunega to kya kahega

tumhaare khat se ye lag raha hai ki rote rote likha hai tum ne
ye an-kahi si tumhaari baaten koi sunega to kya kahega

hami hain mazlum hum hi zalim hami hain maqtul hum hi qatil
hami hain mohre hami bisaten koi sunega to kya kahega

tere tasawwur ka aana jaana mere takhayyul ki wadiyon mein
baghair dulhe ki ye baraaten koi sunega to kya kahega